政情：廢噏摸貨跌60％鬍鬚曾篤數

樓價不斷升溫，縱使煲呔曾政府已經推出多項壓抑樓價措施，但仍然係成效不彰，可見煲呔曾政府仍然未搵到解決樓價過高問題嘅處理辦法。

一向自以為是嘅財爺鬍鬚曾尋日又喺網誌上面提到，目前香港嘅樓市極不尋常，話呢個情況佢舊年已注意到喇喎；佢又吹噓因應呢個情況，已經做咗幾項壓抑樓價嘅措施，好似徵收額外印花稅自從推出之後，已經令到投機活動明顯冷卻喎，仲話今年首五個月摸貨較舊年首十一個月銳減超過六成。

5個月數據同11個月比 出蠱惑

嘩！六成喎。咪住，睇清楚鬍鬚曾講乜先，點解今年首五個月可以同舊年足足十一個月比較嘅？小學生都知道，要做比較，梗係要相同類型或者相同時期咁去比較㗎啦，你用今年半年唔到嘅時期，去同舊年差唔多足一年去比較，請問摸貨數字較少有乜出奇呢？鬍鬚曾好歹都叫喺外國讀完大學，斷估唔會咁嘅數都唔識計，咁即係刻意篤數誤導市民啦，認真卑鄙！

成篇網誌不斷重複又重複咁講自己做咗幾多嘢去壓抑樓市；係，佢係好似做咗好多嘢咁，只不過樣樣都唔奏效呢，香港係國際大都會，市民唔係要一隻牛去做財爺呀，而係要一啲可以提出實質意見、真真切切咁幫到市民嘅人做財爺呀，鬍鬚曾樣樣措施都係半桶水兼且成效不彰，咁出得多招又有乜用呢？

唔睇猶自可，再睇落去更加把幾火，鬍鬚曾話喺目前不尋常嘅樓市同經濟環境下，未來樓市嘅走勢非常難預測，唯一可以確定嘅係風險不斷增加喎。呢啲論點講過無數咁多次，但佢唔預測都係好事，全港市民都知佢做財爺最突出之處，就係成日估錯數，估政府盈餘可以相差成千億元咁多，依家拒絕預測，總算係有自知之明。