烏蠅爹哋易與子女衝突

【本報訊】「皇帝爹哋」、「烏蠅爹哋」、「超人爹哋」—是本港父親因應性格分成的三大類型「港爸」。有處理親子關係的專家指，該三類港爸與子女有不同相處模式，各自因不同原因與子女發生衝突，當中以關心子女但不得其法、不停在子女耳邊「講哦文」的烏蠅爹哋最易令子女反感而起衝突。專家建議三類港爸多讚賞、多關心子女等溝通妙法。

衝突多源於學業問題

香港青年協會親子衝突調解中心單位主任韓曄將「港爸」分為三類，「第一種皇帝爹哋努力賺錢養家，返屋企好攰只會食、瞓同躺喺張龍椅睇電視，咩家庭事都唔理，但有重大家庭事發生就會有激烈反應，大聲罵子女而現衝突；第二類烏蠅爹哋相反就經常管家庭管子女，好似烏蠅咁令子女煩厭，最容易同子女有衝突；超人爹哋就最好，經常參與子女的活動，了解佢哋的諗法。」

韓曄指親子衝突最常於子女踏入青春期十歲左右發生，四成四家庭衝突源於子女學業問題；三成因為家庭溝通及表達方式問題；二成半因為子女行為及成長問題。她指港爸若發現與開始踏入青春期的子女溝通出現問題，便屬發生家庭衝突的警號，「仔女大個敢出聲，突然好多嘢唔聽你講、駁嘴，就要改變溝通方法，唔可以再好似細個咁『命令式』溝通，否則衝突初、中期一路唔理，到雙方關係發展到好僵，就好難再調解。」

韓指親子衝突常因小事而起，如有個案父親誤喝兒子購買的飲品，因溝通不佳差點動武；亦有父親送女兒手機後，因女兒未有致電報告行蹤而摔壞電話，雙方冷戰兩、三個月。她建議親子間可依據處理衝突五部曲冷靜情緒，免關係惡化。