展覽中心拍烏蠅　懶惰官僚浪費公帑

港府最鍾意阿茂整餅，冇嗰樣整嗰樣，淨係所謂宣傳及展覽中心就整咗好多個，而且仲好多元化添。本來呢，設立宣傳及展覽中心幾有意義嘅，內容豐富，應有盡有，唔只對本地人有吸引力，更加係外地遊客了解香港嘅最佳途徑。弊就弊在港府官僚懶散，做嘢唔湯唔水，又冇宣傳，又冇推廣，搞到呢啲宣傳及展覽中心冷冷清清，卒之變成「拍烏蠅中心」。

點樣冷清法？本報記者去過三間宣傳及展覽中心視察，包括香港規劃及基建展覽館、機場核心計劃展覽中心及室內空氣資訊中心，點知除咗展館職員及記者之外，由頭到尾都見唔到其他人嚟參觀過，你話冷唔冷清、淒唔淒涼吖？其中一個展館嘅職員講得夠坦白：呢度平時無人，間唔中有啲團體參觀吓！

叮，你估設咁多宣傳及展覽中心唔使錢咩！事實上，就算完全冇人參觀，營運費用一樣照支出，員工薪酬啦、燈油火蠟啦、維修保養啦，樣樣都要錢，樣樣唔慳得。以室內空氣資訊中心為例，淨係今年四月至明年三月嘅合約費用，就要一百二十幾萬元；香港規劃及基建展覽館仲和味，本年度營運經費高達一百八十幾萬；而機場核心計劃展覽中心過去五年嘅營運開支亦多達三百幾萬。須知呢啲統統係納稅人嘅血汗錢，當局居然用嚟拍烏蠅，咁點只係嘥料，簡直係犯罪喇！

話時話，好多國家同樣開設各種展覽館，吸引遊客參觀，通常都係其門如市，人山人海，點解唯獨香港冇人吼呢？理由好簡單，因為官員懶咯，唔肯做嘢咯。呢啲展覽中心宣傳不足不特止，管理仲亂晒大龍，正如有立法會議員話齋，展覽館大約六點半就閂門，同多數打工仔嘅返工時間差唔多，叫人點樣參觀噃。仲有吖，好多場館得豆腐膶咁大，又欠缺互動設施，莫講普通市民冇興趣，連學校都唔吼喇。

有人成日批評香港景點少，吸引唔到遊客，其實香港唔係景點少，而係港府抱住多做多錯、少做少錯、唔做唔錯嘅心態混日子。當局使咁多錢設立宣傳及展覽中心，但就關人個關，又唔包裝，又唔推廣，由得佢哋拍烏蠅，多多景點都冇用喇。總而言之，夕陽政府等收工，得過且過，香港有運行至奇，叮！