政情：葉劉搵舊部再玩區選
年底嘅區議會選舉係政圈重頭戲，喺立法會仍屬「一人公司」嘅新民黨準備大力擴張，主席葉劉淑儀近年亦積極培訓地區樁腳。近期葉太力捧多名昔日嘅紀律部隊嫡系，圖組成區議會選舉團隊，尋日就首次跳入九龍東開設油塘地區辦事處，由做咗十六年警務督察協會主席嘅廖潔明擔大旗。
同廖Sir喺九龍東拍住上嘅仲有前消防處救護員會主席屈奇安，佢會負責下月喺新蒲崗開設辦事處，至於上月先入黨嘅前消防處職工總會主席崔志強，亦會喺八月落戶天水圍辦事處。
呢隊「紀律部隊」政治團隊雖然人腳唔少，但○七年區議會選舉時，葉太都有相似部署，結果都鎩羽而歸，今次重施故技又大掟銀彈，葉太真係好想敗部復活噃！