政情：搞搞政：鼠王芬有新花名？

因為落區捉老鼠一役，專業會議嘅梁美芬得咗個「鼠王芬」嘅花名，尋日立法會就議員替補機制舉行公聽會，邀請唔少團體同學者發表意見，選民力量代表人物「星屑醫生」歐陽英傑發言時，就拋出「祟」、「皇」、「分」三個評語，炮轟政府嘅建議鬼祟、保皇兼分化，呢幾個字同「鼠王芬」嘅花名同音，搞到鼠王芬都有啲唔開心，直言歐陽英傑好恨佢。

星屑醫生尋日話，政府提出機制嘅過程好倉促，因為政府知道喺民間一討論就死火，一諮詢就爆煲，而且建議有保皇嘅安排，仲將民意簡單分化。佢重複講到「祟」、「皇」、「分」三個字，雖然冇開腔揶揄邊個人，但梁美芬發言都好委屈咁對號入座。

梁美芬話聽到歐陽英傑嘅發言，感覺「歐陽英傑咁恨我」，但佢都冇糾纏花名一事，只話明白彼此有唔同意見啫。不過，鼠王芬都發揮建制派嘅角色，話《基本法》講明香港唔可以搞公投，又話可以用發動總辭嘅資源做下民調喎。