政情：黃英豪108萬投饒宗頤墨寶
國學大師饒宗頤被譽為潮州之寶，早前香港風濕病基金會舉行慈善晚宴，並拍賣饒宗頤教授墨寶《厚德載物》籌款，金至尊集團主席黃英豪（Kennedy）好支持個活動，買枱之外仲用一百零八萬元投得饒老嘅墨寶。
前日大會舉行墨寶及支票頒贈儀式，親書墨寶嘅饒宗頤教授都有出席，仲親手將佢幅字送畀Kennedy，自稱晚輩嘅Kennedy好開心，兩人又合照留念。
Kennedy話，風濕病係一種長期慢性病，連骨都會變形，奈何藥物價格好貴，所以佢一直都好支持香港風濕病基金會，但就冇諗過有緣投到饒老嘅墨寶。Kennedy一直好鍾意《厚德載物》呢四個字，事關同佢爸爸「乾亨」名字一樣出自易經，加上饒老一字難求，仲要係近期嘅新作添，咁難得，難怪Kennedy由八萬八千元底價嗌到一百零八萬元都無聲沙啦！
饒宗頤喺墨寶《厚德載物》上款寫咗送畀黃英豪，作為晚輩真係受寵若驚。