政情：議員爸爸(乙水)仔女有妙法

一年一度嘅父親節到了，香港人出名工作忙碌，有調查就發現父親同仔女相處同溝通時間好少，甚至每日傾偈少過半個鐘添。我哋問過幾位已為人父嘅立法會議員，佢哋平時都係大忙人，同仔女溝通都要盡量諗計，社福界嘅張國柱認為，父親每日同仔女傾偈有十五分鐘都唔錯，最緊要形成一個畀仔女分享心事嘅習慣；馮檢基就捐窿捐罅氹仔仔，佢哋各師各法，其他忙碌嘅爸爸都可以參考吓呢啲方法。

張國柱每日傾偈15分鐘

民協嘅馮檢基話，佢個仔仔今年十七歲，平日功課忙到飛起，兩仔爺真係冇乜機會傾偈。不過佢會抓緊機會，譬如仔仔要交報告，需要向搞開社企同社會服務嘅爸爸埋手，阿基就趁此機會同仔仔溝通：「依家就快到暑假，阿仔又要做義工，佢話對咖啡店有興趣喎，當然要幫吓佢啦！」

社福界立法會議員張國柱有兩個仔，仲已投身社會工作，不過講到同仔女溝通，張國柱好有計，佢話一開始時一定要搵啱佢哋感興趣嘅話題，絕對唔好強迫仔女聽一啲唔啱聽嘅大道理；至於每日傾偈時間唔使太多，十五分鐘就夠喇，只要培養咗呢個習慣，仔女每日都習慣同你傾吓偈，分享心事，咁仔女將來即使遇到問題，做父母都唔會後知後覺嘛。

佢哋兩個嘅方法都唔算絕橋，一句講晒都係重質不重量。白鴿黨嘅涂謹申老婆腹大便便，至今仍未知肚裏面個蘇蝦係男定女。以候任爸爸過父親節嘅阿涂話呢個父親節認真特別，佢暫時唔會太擔心將來太忙碌、照顧唔到小朋友，不過自己已經做準備，九月就會請工人協助太太添。