奪命陷阱處處　蟻民水深火熱

香港被譽為國際大都會，有人甚至形容為「紐倫港」，氹到港府高官鬼咁開心。可惜吖，大就大喇，不過係大大鑊嗰隻，而且仲係鑊鑊新鮮鑊鑊甘添！

呢，早幾日土瓜灣唐樓一場三級大火奪去四條人命，悲痛未過，尋日又輪到大雨奪命，一名渠務署外判工人喺沙井工作期間被突如其來嘅大水沖走，不幸身亡。叮，香港處處都係奪命陷阱，蟻民水火交煎，提心吊膽，真係今日唔知明日事！

冇錯，明日會發生乜嘢事的確冇人可以預測，但明日係父親節就係人都知。講起真係心酸，父親節前痛失父親，人間悲劇莫過於此，呢位渠務工人嘅兒子此時此刻嘅悲痛可想而知。最令人莫名其妙嘅係，尋日天氣持續唔穩定，天文台凌晨仲一度發出黃色暴雨警告，但點解咁大雨之下仲要求工人落沙井做嘢呢？究竟當局有冇監管嘅呢？渠務署外判工作啫，唔通連自己嘅責任都判咗出去？工業傷亡權益會負責人就講得啱嘞，當局必須徹查事件，追究責任，絕對唔可以令工人白白犧牲。

講開又講，香港話就話係國際大都會，但愈睇就愈似一座危城。僭建物遍地開花，劏房無處不在，冧樓、冧樹、冧簷篷、冧招牌，幾乎無日無之。嗱，尋日北角又有一個光管招牌突然塌下，一名女途人好彩閃避得快，淨係受咗輕傷，如果唔係，隨時又搞出人命㗎喇。唉，今時今日嘅香港，冧樓死人，劏房成災，大火焚身，暴雨奪命，港人防不勝防，逃無可逃，唔係危城又係乜嘢！

不過咁，危唔危因人而異嘅啫，官老爺高高在上，唔係住禮賓府養錦鯉，就係住洋樓養番狗，即使唐樓點殘舊，劏房點危險，死嚟死去都係蟻民，完全唔關佢哋事。所以咯喎，出面死人冧樓又好，風大雨大又好，官老爺一於少理，對於佢哋嚟講，有兩件事最緊要，一係按時按候加人工，二係夠鐘退休歎世界。我要做好呢份工？吹水就得！

鄭板橋有首詩係咁講嘅：「衙齋臥聽蕭蕭竹，疑是民間疾苦聲。些小吾曹州縣吏，一枝一葉總關情。」古代做官嘅人假假地都知道民間疾苦，而今日做官嘅人卻視民望如浮雲，世風日下，人心不古，講都嘥氣。冇法子喇，官府靠唔住，大家惟有自求多福，叮！