政情：沈祖堯又獲公職接替徐立之
沙士英雄沈祖堯做咗中大校長後，擔子愈來愈重，兼顧其他公職嘅時間都少咗，尋日政府憲報公布，佢獲委出任司法人員推薦委員會委員，接替夠鐘落任嘅香港大學校長徐立之。
除咗佢之外，剛卸任香港律師會會長嘅王桂壎，早兩、三個星期前先獲委任為機場管理局成員及香港國際仲裁中心主席，今次都接替另一律師會前會長史密夫出任委員，即係有份就法官嘅新任命同升遷提供意見，對法律界影響好大，對盛傳有意參選立法會功能界別議席嘅佢尤為重要。再戴多頂帽，王桂壎會唔會好快成為政府另一公職王呢？委員會另一個新委員就係做過醫務委員會委員嘅林李靜文，接替落任嘅青年協會主席王䓪鳴，而前大律師公會主席袁國強則獲再度委任，四人嘅任命都係為期兩年。