政情：肥仔張勞氣火併KK

強積金供款上下限要調整嘅建議拋出後，勞資又有異議。立法會內務委員會尋日起紛爭，主角係富貴黨嘅「肥仔張」張宇人同工聯會嘅黃國健（KK）。按積金局建議，月薪五千元增加至六千幾蚊，政府希望本月廿九號恢復二讀強積金條例草案修改，以便今年十一月一日起實施，肥仔張話草案咁具爭議性，隨時有人反問點解下限唔係七千元或八千元，建議開個小組研究吓。

KK一聽好大反彈，佢話六千五百元呢個下限，好多團體一早就贊成咗，無需要開個小組去審，真係唔明啲僱主點解好似同僱員有仇咁？肥仔張跟住好有火咁話：「有啲同事似乎人身攻擊，我同員工無仇嘅！」佢仲畀番說話KK聽：「如果議事堂冇爭議，出到去點知有冇爭議呀？呢個唔係有冇仇，唔係剝削員工，同事講嘢應該講得清楚啲，唔好混淆視聽！」內會主席劉健儀見勢色唔對，叫大家快啲講完投票定輸贏，結果十二票贊成、六票反對，通過開小組審議草案。