政情：搞搞政：議員鬥爆病歷撐脊醫

腰痠骨痛尋日成為立法會議事堂嘅話題，事關有脊醫不滿西醫同中醫可以簽發病假紙，但佢哋就被拒諸門外，尋日走去申訴，立法會人力事務委員會尋日亦有討論呢個問題，多位議員發言時仲自爆病歷，張文更大談自己腰骨痛，最後得脊醫打救嘅苦況，批評政府做法對脊醫好唔公道，唔知議員咁樣撐脊醫，算唔算利益衝突呢？

依家全港有百多名脊醫，為腰骨有問題嘅市民提供治療，但政府就唔肯將佢哋嘅專業地位同西醫或中醫看齊，拒絕承認由脊醫簽發嘅病假紙，令好多有腰背痛嘅打工仔，為免蝕咗啲病假而唔去睇脊醫，被迫改睇西醫或者中醫。

張文尋日話，自己都有腰骨痛症，仲懷疑係會議廳嘅舊座位設計係腰痛嘅起因添，工聯會嘅王國興都有咁嘅說法，所以佢哋都支持政府尊重番脊醫嘅地位。

政府方面就死撐，話市民對脊醫認識唔深，亞洲多個國家亦未承認脊醫病假紙，加上如果要修改勞工法例承認脊醫病假紙，涉及好多配套，要等時機成熟先可以推行。