政情：梁卓偉音樂路媽咪譜出來
食物及衞生局副局長梁卓偉係半個音樂人，家吓都為香港兒童交響樂團做客席指揮，每周都要練習，佢尋日同香港大學專業進修學院學生分享音樂人生路時，透露受到媽媽係音樂老師嘅影響，四歲就開始學鋼琴、接觸古典音樂，後來雖然選讀醫科，但音樂令佢一生受用無窮。梁卓偉話，自己讀大學期間，從來都唔揀醫學院嘅溫習室溫書，反而走去音樂系嘅鋼琴室，貪嗰度可以每一、兩個鐘就彈琴放鬆吓。
集音樂人、演員及導演身份於一身嘅資深藝人泰迪羅賓（Teddy Robin）就話，佢對音樂嘅興趣係慢慢培養嘅，之後玩結他、夾Band，直至畀星探發掘入娛樂圈，不過，歌唱事業發展如日方中時，佢卻出國流浪，到大大小小嘅鄉鎮生活，令人生添上好多姿采。
港大專業進修學院院長李焯芬（中）力邀泰迪羅賓（右）同梁卓偉（左）分享佢哋嘅音樂人生路。