政情：學者起義群揪林公公

政制及內地事務局拋出立法會議員替補機制嘅設計後，就惹來泛民議員批評，但林瑞麟一於大石壓死蟹，上個禮拜三已經將《二○一一年立法會（條訂）條例草案》提交立法會首讀，仲希望立法會喺不足一個月內完成審議工作，佢以為攬住個波死衝就得，點知尋日六十幾個學者發表聯署聲明，直指政府嘅草案有問題，法律界亦有異議，兩大專業界一齊出聲，林公公呢次闖關真係困難重重！

超過六十個本地大專學者嘅聲明話，替補安排完全改變依家嘅選舉方法同法例，亦剝奪了市民嘅投票權及參選權，促請政府撤回建議及重新諮詢公眾。千祈唔好以為啲學者講完就算，佢哋上個禮拜開始蒐集簽名，拿拿聲就有六十幾人同意，嚟緊佢哋仲會喺八間大專院校繼續搵支持者，相信未來加入反對陣營嘅學者會有增無減，而且支持者來自公投派同非公投派添。

斥林公公 厚顏無恥

有份發起呢次簽署嘅城大政治學講座教授鄭宇碩尋日話，政府搞呢次替補機制，係人都知為咗防公投，因為佢哋對公投有禁忌，佢直指以修改法例嘅手法防止公投，絕對係荒謬嘅事，勢令香港成為國際笑話。講到呢度，佢更加不點名狠批林公公「厚顏無恥」。

教協嘅馮偉華就話，今次調整係對選舉制度嘅根本改變，政府用閃縮方法處理重大議題，明顯想側側膊通過條例，對本港長遠發展不利。佢哋話，嚟緊會以出席公聽會、繼續搵人簽署嘅方式抗爭，希望以專業喚醒市民嘅關注。

林公公原本想跑快啲，最好逼到立法會閃電通過呢個法例就萬事大吉，點知家吓殺出程咬金，好夢睇怕成空囉。