短打長擊：夕陽政府 撐都冇用

港澳辦主任王光亞日前訪港，於午宴致辭時呼籲各界支持特首施政，毋須憂慮被邊緣化。回歸十四年，香港在一眾庸官的管治下搞到天怒人怨，愛國愛港者迭遭迫害，反中亂港的洋奴漢奸反而有運行！再加上弱勢基層冇啖好食，政府派六千蚊派到依家都未見影，正一餓死都未得天光，咁嘅政府，你話市民又如何撐得落呢？

煲呔曾嘅民望「飛流直下三千尺」，其餘一眾司局長亦如黃腫腳──不消提！之不過，有一個人唔提又唔得，佢就係鍾意寫網誌兼廢噏嘅財爺鬍鬚曾，佢理財無能，負面新聞一籮籮，今日會上立法會就葛輝事件解畫。鬍鬚曾被指向下屬作政治施壓，大家即管睇吓佢如何拆「荒」解「謬」，是否好似佢喺網誌引用蘋果公司創辦人喬布斯嘅名言：Stay hungry, stay foolish（求知若渴，虛心若愚）？

真係笑死人冇命賠，如果佢求知若渴，理財就唔會「五時花六時變」啦！香港向來嘅「審慎理財」，就咁死喺佢嘅「求癡若渴」腦缺水之下！

再講，如果鬍鬚曾虛心若愚，就唔會喺發表財政預算案前狂花公帑叫人「留意見唔一定要留鬚」，又出公仔書廢噏理念，到頭來又係用番佢自己嗰套超低能、勁搞笑嘅「理財」廢料！咁嘅質素，正如網民所講：講就諸葛亮，做就豬一樣！

王光亞一片苦心撐夕陽政府，可惜煲呔曾及其班子，正如毛澤東曾引用的一副對聯：「牆上蘆葦，頭重腳輕根底淺；山間竹筍，嘴尖皮厚腹中空。」