打煙民唔打私煙 虛偽局長係老千

港府以前吹噓要搞乜港物港，最後中藥港呀、鮮花港呀全部變成大隻講。哈，有心栽花花不發，無心插柳柳成蔭，受惠於港產官僚自相矛盾嘅禁煙政策，香港今日終於成為「私煙港」，私煙產業蓬勃發展到你唔信！叮！

咁啦，未講本港私煙王國嘅業務新里程前，睇吓一單新聞先啦。立法會尋日正式三讀通過加煙稅法案，大幅調高稅率四成。當局聲稱，加煙稅有助煙民脫離吸煙行列。不過，呢種類似迷煙黨嘅哄騙言論，呃到自己呃唔到市民。海關數據顯示，今年首季檢獲私煙數量激增，反映愈嚟愈多市民被迫轉食平價私煙。如果咁樣係對煙民健康好，除非你夠膽死話食私煙更加有益啦。

加煙稅係咪禁煙嘅最上乘之法，社會上至今言人人殊，莫衷一是。之不過咁，港府打擊私煙不力，除咗販賣私煙嘅私梟之外，相信都冇乜邊個唔喪鬧。正如立法會議員批評，私煙瀕臨失控，政府執法不力，簡直係不負責任同無能。

嗱嗱嗱，港府一方面狂加煙稅令煙民叫苦連天，堂而皇之話要逼人戒煙，一方面又唔去重錘打擊私煙，搞到私煙氾濫荼毒市民，反而助長咗私煙黨興旺，係咪好荒謬先？呢個咁詭異嘅情況，簡直可以攞嚟寫《無間道》外篇，劉健明靠擦鞋爬上食衞局局長之位，勾結私梟老大隻手遮天。最可憐係戒煙不成嘅煙民，從此墮入無間地獄，喺捱貴煙同劣質私煙之間輪迴受苦。

私煙黨有幾猖獗呢？即係咁，以前私煙匿埋嚟搞，今日犀利咯，當攞正牌嚟做。本報揭發，私煙呢種新興行業喺港府打擊不力下極速發揚光大，業務踏上新里程。不法分子狼到聘請少女派傳單兼送貨，貪十幾歲嘅後生仔女唔易受懷疑吖嘛，可以大模廝樣將私煙傳單楔入信箱，甚至逐家逐戶楔入門隙裏面招徠客源。呢種新一代私煙傾銷手法，已經攻陷將軍澳、天水圍同元朗等新市鎮，簡直當海關透明！

講到呢度，大家或者會問，點解私煙黨會咁猖獗？點解私煙生意一片欣欣向榮，大有香港第五大經濟支柱之勢？如果你去請教食衞局局長周一嶽，麻煩你幫太一叮問多一句，港府口口聲聲話禁煙，但係打擊私煙軟手軟腳，變相幫私梟拉生意，咁樣算唔算係虛偽？係咪專搵人笨嘅老千行為？叮！