政情：問責官想加薪各黨說不
公務員今年加薪幅度破晒紀錄，一眾民望跌至谷底嘅問責官員竟厚顏無恥，趁公務員加薪之際，伺機要求將人工恢復至○九年自願減薪嘅水平，即係加番百分之五點三八。企圖加薪嘅消息一出，立法會跨黨派幾乎全say no。
白鴿黨張文光話問責官員○九年減薪係順應民情，唔等於依家公務員加得多，就可加埋一份，而當日呢班高官有份批准公務員加人工，質疑佢哋有角色衝突，疑為自己叫價加薪鋪路。佢話：「問責官員聲望在民望中創新低，依家要求加人工，只會令民憤火上加油，咁叫做陸雲庭睇相，唔衰攞嚟衰。」有建制派議員話唔係公務員加咗，問責官就有得加，要睇整體表現同市民期望。咁即係話連建制派隨時唔支持加薪。