政情：搞搞政：電台播立會悶親粵曲迷
香港電台第五台每逢周三都因為要轉播立法會會議而暫停播放原有節目，但工聯會嘅議員葉偉明話收到唔少長者投訴，話今年嘅立法會會議好多時都會延續幾日，搞到佢哋連續幾日都冇得聽粵曲，所以佢計劃月底喺立法會提出質詢。
又好難怪啲長者嘅，事關啲議員經常喺大會上提出緊急質詢同休會辯論，大放悶蛋，又成日喺會上亂噴口水、借題發揮、離題萬丈，令大會成日淪為馬拉松會議，要搞兩、三日，難怪聽到班長者火都嚟埋。
葉偉明話打算質詢港府有冇評估過喺港台第五台轉播立法會會議對聽眾嘅影響。不過，佢本身都有份喺大會上噴口水、放悶蛋，唔通佢都覺得周三大會廢到唔值得轉播？咁咪即係柴自己台！
