政情：王雪紅捧HTC唔用iPhone
宏達電子（HTC）尋日舉行股東會，班小股東為咗一睹台灣女首富王雪紅嘅風采，幾乎逼爆會場。面對唔守規矩嘅股東擾亂議程、狂問問題，王雪紅耐心詼諧回應，反而係執行長周永明就發晒老脾。
呢兩日外資係咁掟HTC嘅股份，股價由一千三百（台幣．下同）跌到尋日一千零七十元。面對股東質疑HTC係咪仲值得投資，王雪紅好有耐性話「營運唔能夠只睇股價嘅高低，仲要睇公司嘅基本面，依家基本面仲好好呀」。由於有股東係咁搶住問嘢，激到周永明隔空開火，甚至窒股東「你以為呢度係立法院咩？」
王雪紅今年初去咗蘋果專賣店買嘢畀人認出，尋日有人問「蘋果好唔好用」？佢就話：「我唔用iPhone，我絕對只有用HTC」；平板電腦Flyer亦比iPad好用得多。咁梗係要捧自己喇！
王雪紅