政情：白鴿中委廢噏再搞「公投」
白鴿黨舊年因變相「公投」同社民連反晒面，但其實該黨裏面仲有人對變相「公投」樂此不疲，佢就係中委林立志。一批白鴿黨青年成員尋日召開記者會，公布反對立法會出缺替補機制嘅連串行動，期間林立志忽發奇想，提議舊年辭職嗰五名議員為替補機制再次辭職，發動第二次變相「公投」等選民可對此表達意見。
林立志話口未完，已自覺可能講大咗，即時補飛話其實嗰五名議員亦未必會肯再做一次，因為今年十一月就係區議會選舉，佢哋再次辭職可能會擔心畀人批評浪費公帑。坐喺佢旁邊嘅中常委莫兆麟亦連忙補鑊，話林立志嘅建議只係個人意見，並企圖轉移視線，指佢哋曾就此相約青年建仔商討替補機制，但至今未獲對方答應等等。
林立志（左）亂噏再搞變相「公投」，搞到身旁嘅莫兆麟要連忙幫佢補鑊。