政情：區會委任制「僭建」篤中林公公死穴

政府對取消區議會委任制採取拖字訣，泛民主派嘅議員尋日又喺立法會透過口頭質詢，要求政府講清楚究竟幾時取消。不過，政制及內地事務局長「林公公」林瑞麟仲係話研究緊，但會喺年底區議會選舉前提出建議，惹來泛民議員極度不滿，職工盟李卓人就單刀直入，大聲質問：「你答我！你幾時拆啲僭建？」搞到林公公即時都O晒嘴。

可能林公公心諗，自己早已拆晒屋企天台啲僭建物啦，點解又問佢幾時拆僭建？阿人就解釋話，區議會委任制呢個「政治僭建」由九八年僭建到依家，一路都冇拆，仲話：「你（林公公）自己屋企都僭建，你都唔敢話要研究係咪一次過拆晒佢啦！」質疑點解政府唔一次過剷走呢個「區議會委任制僭建」。不過，林公公繼續發揮人肉錄音機本色，播帶應酬大家。

其實選管會早前都提出一個類似僭建嘅議題，建議將網台製作嘅選舉節目同電視電台看齊，須遵守「平等時間」原則，引起社會極大反響。選管會尋日喺提交立法會嘅文件上明顯褪軚，指已聽到市民嘅反對意見，認為建議指引有修訂空間，喺仔細研究意見後會考慮點修訂，令指引更切合實際情況喎！

涉偷步選特首 唐唐被追瘦

除林公公外，泛民亦會追瘦政務司司長唐唐，事關佢早前被揭涉嫌擅用公帑，搵新聞秘書同新聞處職員幫手偷步搞特首選舉工程。繼白鴿黨日前去信要求煲呔曾同唐唐跟進後，公文袋黨魁袋巾傑亦計劃月底喺立法會提出質詢，要求政府交代唐唐同班涉事公務員咁做有冇違反《公務員守則》同《行政長官選舉活動指引》，以及當局會唔會就事件進行調查。

袋巾傑有意再喺下屆特首選舉代表泛民披甲上陣，呢項質詢難免令人覺得佢有抽水之嫌，事關喺逼唐唐交代之餘，又可趁機攻擊「對手」嘛！