六月飛窗有內情 官僚懶散如取命

如果話，六月飛霜係要揭示民間有重大冤情，咁「六月飛窗」呢種都市異象又帶出乜嘢社會意義？

開估之前，不如睇睇一單新鮮熱辣嘅公屋飛窗事故先啦。飛窗現場係樓齡十四年嘅葵涌石籬邨石泰樓，前日朝早樓下行人路突然傳來巨響，一扇一呎半乘兩呎鋁窗連窗框由高空直墮地面爆裂，碎片四濺，好彩無街坊中頭獎咋，唔係嘅話，後果不堪設想。

警員到場調查，發現鋁窗由十四樓一個單位嘅浴室脫落，鋁窗為何無端端飛落街？男戶主爆，原來早喺兩年前，已經向房屋署反映窗框有問題，房署亦有派人上門睇過，不過，職員竟然真係睇吓就算，影低鋁窗張相就當交差，之後闊佬懶理，再無跟進。離譜嘅係，戶主主動向房署查詢，竟如泥牛入海，一直無回覆。

兩年危窗無人問，好明顯，懶散官僚敷衍塞責先至係飛窗事故元兇。相比起房署，肇事鋁窗支撐兩年先至離戶主而去，都算盡責囉。窗戶本是無情物，都不甘墮落緊守崗位，房署身為樓宇安全監管部門，未有克盡職責搶救壞窗，見到鋁窗跌到粉身碎骨，險傷途人，唔知有冇半點歉疚，有冇少少面紅感覺呢？叮！

嗱，當局懶理窗戶安全，後果真係可大可小㗎。首先就罔顧公眾安全啦，過往天降橫禍無辜受害嘅市民不計其數。正如有區議員怒斥，墮窗事件一次都嫌多，署方唔可以抱僥倖心態，實有必要全面檢查肇事公屋全數鋁窗嘅安全。其次咯喎，高空墮窗引致他人受傷係刑事罪行，可被判監同罰款，如果官僚失職，公屋住戶受刑，咁就真係冤過竇娥冤咯！

提起飛窗事故，就不得不提○五年嘅經典紀錄咯，又係時值炎夏六月天，唔知係天雨連連嘅關係吖，定係上天有意顯現異象警示港府，全港各區連環爆發近廿宗鋁窗飛墮事件，促成港府推出強制舊樓驗窗嘅諮詢文件。可惜嘅係，大家都知港府辦事效率有幾高㗎喇，直到上年二月，當局先至向立法會提交相關法例草案，至今仲喺審議之中。即係話，呢條用意加強窗戶安全嘅新例，唔止係姍姍來遲，更加係有排都無法實施。

好嘞，係時候開估，「六月飛窗」現象正正就係揭示港產官僚敷衍失職，分分鐘害死人，同六月飛霜嘅詭異劇情一樣，受害市民都係咁冤枉。鬼唔望六月飛窗其中一隻落正喺懶散官僚頭上，扑醒佢哋咪再魂遊太虛，咁就上天有靈咯。叮！