政情：搞搞政：安排京官見青年 陳振彬乜都唔知

訪港三日嘅港澳辦主任王光亞今午將會見近百青年人，活動由青年事務委員會主辦，活動並冇採訪安排，我哋尋日致電青委會主席陳振彬，想問吓會面內容，例如出席嘅青年係點樣篩選等，點知佢「甚麼都不知道」，仲反問記者活動喺邊舉行，之後佢叫我哋問特首辦。

究竟陳振彬係真唔知定係假唔知？抑或係有人叫佢「扮唔知」？真係佢自己先知。

對於自己乜都唔知呢個現象，佢認為問題唔大，話因為「唔同人有唔同做事作風」喎。特首辦就話，今日嘅活動由青年事務委員會主辦，由特首辦統籌，講得出有一百青年出席，喺柴灣青年廣場舉行。即係話主辦嘅唔使做，統籌嘅做咗乜，唔使話畀主辦嘅知？咁係咪話陳振彬做咗特首辦主任譚志源嘅扯線公仔？