政情：媽打叫無能政府放低官威

唔少前高官都睇唔過眼，紛紛喺離任後炮轟煲呔曾政府無能、脫離民意。民政事務局前常任秘書長「媽打」李麗娟雖然冇加入退休高官合唱團，但佢尋日接受電視台訪問時亦話：「我覺得官威係唔需要，別人要尊重你，唔係因為你好威風，而係因為你好好，因為威只可產生害怕，但你唔係想市民有呢個感受。」媽打真係一矢中的。

政府經常畀人鬧爆官僚，媽打話識寫文件嘅官員大有人在，又話：「如果官員願意多接觸市民，可能依家就唔會有啲政策，畀人批評唔夠切實。」

媽打仲話社會怨氣大，但因為年輕人夠膽有理想，唔怕權貴，所以至走出嚟篤穿「皇帝的新衣」，佢話：「社會入面係有好多怨氣，呢個大家唔好呃自己，但係點解年輕人會特別多怨氣呢？因為年輕人係最有理想，由佢哋發聲，就係希望多啲政府嘅人會聽到。但我覺得呢班年輕人嘅怨氣，唔係由自己利益出發，佢哋真係希望社會好，所以政府要聽。」

佢臨尾仲教精呢個政府，話同青年溝通，兩個t字最緊要，就係talk同time，即係傾偈同時間。之不過，若果政府肯做嘅話，就唔使搞到今日咁嘅狀況喇！