政情：公開活動驚畀人圍 謝凌潔貞龜縮

多名政府高官接二連三喺公開場合講多錯多，早前爆出「六四沙石論」嘅教育局常任秘書長謝凌潔貞都要對公開活動講句怕怕，甚至龜縮。點解？

被嘲封閉只能閂埋門傾

學校輔導服務聯盟尋日喺教協銅鑼灣會所搞咗個《學校輔導服務出了甚麼問題？》研討會，聯盟成員包括教協、立法會社福界議員張國柱嘅議員辦事處等，負責主持嘅教協副會長黃克廉爆料話，原來一個半月前謝凌潔貞曾經答應出席，聯盟亦喺研討會宣傳品上印咗謝太個名，點知隔咗幾日，謝太親自打電話畀負責聯絡嘉賓嘅聯盟男職員，氣沖沖咁話唔嚟嘞！

黃克廉話原來謝太唔知係公開活動，從其他途徑知道研討會有公開人士在場，直接話「呢個係公開活動，咁咪即係聯合圍攻我哋？」就算聯盟後來提出搵其他教育局代表頂替，教育局結果都冇派人出席。

後來聯盟宣傳品都刪咗謝太個名，黃克廉笑住話：「乜原來咁封閉，只能夠閂埋門傾。」而嗰位男職員就向記者證實曾接過謝太電話，話覺得謝太當時都幾嬲喎。

張國柱就話研討會已過，謝太出唔出席都冇乜影響，相信事件屬誤會，但承認謝太講過唔得閒出席同唔想出席公開研討會，張國柱仲話：「其實研討會都無咩公唔公開，研討會完咗大家都係知內容㗎啦。」

教局解釋因為私事缺席

教育局就回覆話，當初係聯盟成員之一嘅張國柱邀請謝太出席，但謝太唔知討論嘅形式其後變咗公開研討會，之後因為有私人事務而唔出席，幾星期前已經通知咗張議員。局方嘅回覆冇提到跟另一男職員嘅對話。