白車調派冧機　緊急救護兒戲

顧名思義，救護車嘅用途係救急扶危，所以，一定要爭分奪秒，絕對唔可以出現任何延誤。可惜喺本港，救護車服務不嬲亂到冇朋友，唔止經常延誤，仲經常死火，甚至成個系統冧機添吖！

消防處早幾年花咗大拿拿七億元引入第三代調派系統，當時吹到天上有，地下無，話可以利用先進電腦技術偵測救護車位置，令救護車喺最短時間到達現場喎。事實係咪咁呢？梗係唔係喇，自從消防處換咗呢個系統後，幾乎日日有故障，唔係呢樣唔妥，就係嗰樣唔掂，最慘係周不時冧機，搞到亂晒大龍。

呢嗱，又出事喇。呢個所謂第三代調派系統日前突然跪低，搞到通訊中心要用手機向白車發送指令，而前線救護人員打電話返中心亦「大塞車」，「排長龍」，最長嘅排到四十位。據講故障維持咗兩、三粒鐘，但消防處聲稱只有四十分鐘，仲話只影響十多宗緊急救護召喚喎。

叮！救人如救火，兩三粒鐘又好，四十分鐘又好，究竟有乜嘢分別呢？正如立法會議員話齋，就算故障只有四十分鐘都唔可以接受喇，因為後果可以好嚴重，隨時死得人多o架。眾所周知，危急病人如果喺黃金幾分鐘內得到適當救援，存活機會就大增，調派系統出錯咯喎，莫講影響十多宗救護召喚咁多，就算影響一宗，都唔可以原諒喇！

話時話，今次就話冇搞出人命啫，但唔會次次都咁好彩o架。嗱，早前荃灣有個阿伯心臟病發，調派系統居然捨近求遠，喺長沙灣跨區派白車去救人，令阿伯延誤八分鐘送院，卒之冇咗條命。不可一，不可再，唔通消防處連咁嘅道理都唔知！

其實，呢個所謂第三代調派系統已經唔係第一次出事嘅嘞，○八年就試過全面「當機」，要改為人手操作，導致八宗救護車服務延誤。睇嚟呢七億元真係使得冤枉囉，叮！

講真喇，何止調派系統靠唔住，成個消防處嘅救護服務不嬲都烏龍百出嘅喇。最離譜係老爺白車甩皮甩骨，行行吓就跪低，早幾年仲試過白車死火，要由幾個消防員抬病人去醫院，鬧出「人肉消防車」嘅大笑話添！

唉，香港政府窮到只剩下錢，居然要搞到咁嘅地步，講出嚟真係失禮死人！