政情：搞搞政：周一鑊烏鴉口咒衰賽駒

台灣唔少食品畀塑化劑污染嘅風波愈鬧愈大，本港都相繼發現好多食品、藥物出事。一向後知後覺嘅食物及衞生局局長周一鑊初期表現滋油淡定，仲一口拒絕將塑化劑納入恒常食品監察機制，近期事件升級，佢似乎都開始腳軟，尋日入沙田馬場為「惠澤社群盃」做頒獎嘉賓時，竟然攞塑化劑嚟講笑，希望參賽嘅「塑料勁」唔好跑出喎，結果「塑料勁」真係畀佢把烏鴉口咒中，做高官做成咁，真係得人驚！

周一鑊話入親場會做足功課，好似尋日佢都有刨定馬簿，知道賽駒當中，有匹名叫「塑料勁」，但佢真係唔想呢匹賽駒跑出，事關如果輸咗嘅話，啲投注額就可以用嚟做善事喎。似乎疏忽咗其他人感受噃！

何況呢匹馬係六十三倍大冷門，投注額多極有限，周一鑊嘅說詞真令人質疑，或者近期畀塑化劑風波升級，煩到爆嘅佢一見「塑料勁」呢幾個字就好敏感啩！