政情：學聯絕食活動有人偷食？
今年六四活動有好多小插曲，香港專上學生聯會當日喺時代廣場對出空地舉行六十四小時絕食活動，不過其中一位參與者、港大學生會外務副會長蕭健滔，就畀人質疑佢犯規「偷食」，日前仲畀港大學生會評議會對佢通過遺憾動議。不過蕭健滔就強調事件只係一場誤會，自稱只係喺絕食活動後冇聽護士勸告，偷食牛腩麵同芝士蛋糕，絕冇喺絕食期間食嘢。
前日港大學生會評議會傾番六四燭光集會安排問題，期間有人揭發蕭健滔早前喺網站留言，自爆「我已經偷食了很多東西；胃痛」，懷疑佢喺絕食活動中偷食。蕭健滔就話個留言係活動完咗之後至發帖嘅，強調絕食時一直有護士睇住佢哋嘅健康情況，話長時間冇食嘢會影響人嘅消化系統，吩咐學生活動完咗後暫時只准食粥，不過佢就冇聽護士話，去咗食牛腩麵同芝士蛋糕，卒之搞到胃痛，仲要畀人誤會添。