政情：范太叫王光亞咪亂放風

港澳辦主任王光亞今日起訪港三日，好多人都關注佢會唔會講吓下屆特首人選，或者趁機收風、放風。疑似特首候選人、全國人大常委范徐麗泰（圖）尋日就話，王光亞今次訪港係想同各界人士見面，唔適宜喺咁嘅場合談論有關下屆特首或者疑似候選人嘅事喎。

范太尋日出席一個青年高峰會後話：「因為佢（王光亞）係中央好高層嘅官員，我認為佢唔適宜講呢方面嘅說話，如果唔係香港會有啲朋友話，你睇吓中央幾明顯干預香港嘅事務。」有政界中人品評范太呢番話，認為睇番《基本法》，特首人選必須經中央任命，絕非純香港事務，點解中央高層官員唔適宜談論？

而且近排香港有好多政商界人士都就下屆特首嘅條件同人選表態，范太仲提到下屆特首要面對《基本法》第二十三條立法挑戰添，咁又算唔算干預呢？唔通有人擔心王光亞會講咗啲唔啱自己聽嘅說話？或者擔心啲說話影響咗大局？