政情：林公公累李慧琼被踩場

政制及內地事務局局長林瑞麟拋出立法會議員替補機制建議後，幾度畀泛民議員狙擊，尋日佢出席建仔立法會議員李慧琼（Starry）喺馬頭圍嘅新辦事處開幕禮時，就遇到當區地膽民協派出十人踩場抗議，呢場臨場加演嘅攔途抗議騷，當堂搶晒Starry嘅風頭。

儀式未開始，民協當區區議員莫嘉嫻已經帶埋黨友，拉住「政府歪理兼霸道，反對無理替補制」橫額，企正喺Starry議辦開幕禮門口靜候。林公公一到場，即刻好禮貌咁接收民協嘅請願信，仲即時就佢哋嘅訴求回應咗幾句，呢場攔途抗議騷即時成為會場焦點。

馬頭圍除咗係民協地頭，亦係工聯會總部嘅所在地，兩個政團喺上屆區議會選舉撼到天昏地暗，最後由民協勝出。Starry尋日就形容，明知工聯會喺附近，都能夠開得成議辦係「夢想成真」，好似暗示緊工聯會已經棄守該區。