政情：維園阿哥講風流唔認隨便

「維園阿哥」任亮憲從非禮及強姦指控醜聞中甩身後，個人作風亦逐漸回復舊貌，尋日佢出席一個電台節目時，就好唔避諱咁大講風流，以及自己同女人嘅關係等。被問到係咪好多女友時，佢話「唔可以用多嚟形容」，只係話家吓有固定嘅感情；至於佢算唔算一個風流嘅人﹖維園阿哥嘅回答更加模棱兩可：「男仔識女仔、女仔識男仔好正常！」番說話真係可圈可點！

維園阿哥喺「城市論壇」闖出名堂後，就同政圈中唔少泛民小花來往甚密，捲入強姦指控後，佢嘅感情世界亦相繼畀人揭開，尋日佢喺電台開腔講男女關係，一於自己揭開感情嘅面紗。自言一直喺外國讀書嘅佢被問到係咪好多女友時，好謹慎咁話女友數目唔可以用「多」字嚟形容，但佢都承認家吓有固定嘅感情關係。

話爸爸嗰套不合時宜

咁佢對男女關係係咪好casual（隨便）呢？維園阿哥一於否認，話自己不嬲只係「對人好有信心，抱住真心誠意」。佢仲話，喺外國讀書返港後，發現文化係有「差異」，要相應調整一下，仲話：「依家冇咩識新朋友，識朋友都會選擇。」

講完情事，話題去到佢爸爸、前立法局議員任善寧。任爸爸當年都係民主派，但政治立場同表達手法都溫和得多，同任亮憲家吓嘅激進手法好唔同。維園阿哥就話，爸爸做議員時香港嘅政治環境同氣候都同依家唔同，依家唔大聲人哋聽唔到，引唔起關注，所以爸爸嗰套已經不合時宜。