短打長擊：嚴打僭建 裝腔作勢

發展局局長林鄭月娥面對僭建大風暴，反口覆舌，一時一樣，最初強調僭建問題複雜，企圖以「理順」把一些非法僭建物合法化；豈料她近日在立法會回應議員質詢會否接受業主補地價即可保留僭建物時，「好打得」形象忽然上身，澄清「絕無此事」，揚言有關建議是「唔可以考慮，想都唔可以想」。

從「理順」到「唔可以考慮」，這是口頭加緊打擊僭建的一大步，然而，是否不分港九新界豪宅丁屋，政府在行動上都能一視同仁呢？好，筆者就放長雙眼，睇吓林鄭月娥如何施展硬橋硬馬的「治僭良策」！如果佢真係以「外儒內法」搞掂呢單嘢，下屆特首唔搵佢出馬就真係暴殄天物，係特區嘅損失，擺喺度嘅人才都唔用，亦係一種罪過。

熟諳法家奧秘的統治者，對越律犯亂者往往嚴刑酷法，刀劈斧鑿，甚至株連九族，殘暴之極，這顯示統治者一以貫之的信條：不以挑戰人性底線的方式，難以達到箝制天下、長治久安的目的。如今有新界鄉紳揚言搞「流血革命」保衞僭建，亦有人不理勸喻不肯清拆天台僭建，林鄭月娥如何處理？果真是天將降大任於「好打得」乎？

然而，唔通講吓都冇自由？裝腔作勢都唔畀？看守政府剩番十零個月，全港僭建物多如恒河沙數，夕陽餘暉所餘無幾，問你如何一一視察？據云最少有四十萬個僭建物，屋宇署除了「自己友查自己友唔係僭建」快之外，一年只係發出約三萬張清拆令，但很少檢控，如何能解決問題！