食品藥品皆有毒 把關豈能懶懶閒

塑化劑風波愈搞愈大鑊，食品有問題，化妝品有問題，保健產品有問題，藥品有問題，連兒童抗生素亦走唔甩，而且仲牽涉國際知名大藥廠添。

繼台灣及美國之後，本港衞生署日前亦驗出葛蘭素生產嘅一種兒童抗生素含塑化劑，含量係歐洲標準兩倍，真係唔講得笑。既然藥物有問題咯喎，就梗係要回收喇，哈，點知葛蘭素竟然完全當衞生署冇到，唔單止冇安排回收，仲堅持塑化劑含量遠低於歐美官方水平，「支持病人安全服用」添。直到衞生署警告可能採取法律行動，藥廠尋日先至死死氣同意回收。

正所謂見微知著，今次事件除咗顯示衞生署係無牙老虎，仲證明港府對食品及藥品嘅安全監管形同虛設。試諗吓，畀細路仔使用嘅抗生素都咁鬼兒戲，大人使用嘅藥品豈不是更加冇保障？旨意衞生署替港人把關喎，真係諗都唔好諗。

講開又講，家陣問題食品、問題藥品無處不在，以前就話內地嘅產品靠唔住啫，依家連台灣、歐洲甚至美國亦問題多多，簡直防不勝防。呢，歐洲最近爆發出血性大腸桿菌疫情，三千幾人中招，三十人死亡，查咗一大輪都查唔出源頭，直到尋日先至確定德國嘅芽菜係元兇喎。歐洲疫情仲未平息，點知美國雞肉又被發現含有砒霜，台灣淡水魚亦含有塑化劑，真係一波未平一波又起，問你怕未。

講番香港吖，夏天到喇，乳酪雪糕店開到成行成市，但本報委託理工大學化驗就發現，六個乳酪雪糕樣本中，竟然有四個含大腸桿菌，其中兩個仲超標逾十倍添。唉，連食杯乳酪雪糕消暑亦隨時中招，你話係咪防不勝防吖！

最無奈嘅係，近年愈來愈多人選擇有機食物，以為健康啲、安全啲，點知依家連有機食物亦一樣受污染，一樣信唔過。民以食為天，變成民以食為憂，咁搞法，人類遲早食無可食，叮！

嗱，唔好話太一叮唔提醒吖，問題食品、問題藥品殺到埋身，危機四伏，如果港府仲係拾吓拾吓，只識頭痛醫頭，腳痛醫腳，隨時整鑊杰撻撻嘅咋。點樣預防？好簡單啫，嚴格把關，寧緊勿鬆，主動出擊，加強抽驗，如果唔夠人手，咪增加咯，人命關天，金錢應使則使，冇人會反對嘅，係咪！