政情：搞搞政：高達再向鬍鬚曾下戰書

本港樓市熾熱得幾近失控，政府拖拖拉拉，到尋日至連環出招，發展局局長林鄭月娥表現得好得戚，尋日公布推出幾幅用地興建住屋，中午出席立法會午宴時，一見到白鴿黨嘅李永達（高達），就笑笑口叫高達考慮辭職，原來佢係大高達年初話政府可以供應三萬個單位就辭職。點知高達反窒佢，仲再向房屋政策嘅大老闆財爺鬍鬚曾下戰書，話當時所講係四萬個單位，政府有呢條數，佢咪辭職囉！

不過，呢個係一個政治賭局，反過嚟講，即係如果鬍鬚曾做唔到呢條數，都要辭職噃！

林鄭話尋日政府一口氣推出八幅土地拍賣同招標，涉及六千個單位，證明政府冇講大話，但可唔可以做到四萬個單位呢條數呢？林鄭梗係冇講啦，佢哋兩個你一句、我一句，都係冇答案。