政情:潮人潮App認識潮州

智能手機興起後,各色各款應用程式 (App)就推陳出新,香港潮州商會今年踏入九十周年,搞咗連串慶祝活動,最得意嘅係佢哋舊年開始研究嘅《潮人潮App》就快喺九月登場,等啲鄉親有多個平台玩,亦令市民更容易了解潮州。一眾潮商靈魂人物尋日齊集尖沙咀海運大廈,為佢哋舉辦嘅「人間有情」攝影比賽舉行頒獎禮,有會董就專登展示吓已經進入試用階段嘅App。

呢個App內容多多,最得意係可以學潮州話,仲有吃喝玩樂嘅指南,亦可以即刻登會內消息,譬如個攝影展活動都好快上載咗。講開攝影展,潮商永遠名譽會長莊學山、會長陳幼南都帶埋太太溫馨撐場,副會長胡劍江更加有兩幅喺澳洲影嘅作品參展。

陳幼南(中)同胡劍江(左)、潮商會董兼青委副主任胡炎松(右)展示即將登場嘅手機應用程式《潮人潮App》。