政情：Eva博懵催立會開綠燈

機管局公布咗第三條跑道諮詢方案後，好多人都畀一千三百幾億元嘅建造方案嚇親，運輸及房屋局局長鄭汝樺（Eva）尋日喺立法會推銷方案時，力勸議員要放眼將來，仲話一旦落實工程之後，政府一定會嚴控建築成本，但就唔敢保證嚴控到乜嘢水平；至於議員抽秤環評，佢又係話初步評估就夠喇，講嚟講去，Eva都係想打死狗講價，只要博到立法會開綠燈，敲定工程就算數，只係議員唔肯、市民都唔制呢！

議員促公開更多資料

立法會經濟發展事務委員會尋日召開特別會議討論機場擴建規劃，Eva親身落場推介，好多議員都圍繞造價高達一千三百億嚟提問，擔心工程費過高之外，仲驚可能係一個深不見底嘅無底深潭。「大舊」陳偉業批評新跑道昂貴到「好似開水喉」，亦有議員要求機管局考慮其他減低成本嘅方案，白鴿黨嘅甘乃威就要求機管局先進行環評，等公眾有更多參考資料，再決定係咪支持起新跑道。

Eva口口聲聲話明白議員同市民擔心造價太高，亦知道環評工作好重要，不過，講到政府立場卻係另一回事。佢話，如果落實咗工程，政府必然會嚴格控制成本，亦會避免無謂嘅使費。至於環評，佢更捏住議員驚使多錢嘅心理，話如果做詳細環評，分分鐘要使成億元，講到尾，又係要議員開咗綠燈先，只要敲定咗工程，政府一定會慳錢同環保㗎喇。

聽真啲，Eva呢番話真係有啲似寶藥黨嘅台詞，又似係細路仔玩泥沙，試問諮詢階段都唔畀市民足夠嘅資料，一味叫人扑錘先，邊個會睬佢呢？難怪尋日會議上，公文袋嘅陳淑莊同其他議員都要求機管局公開更多工程資料，等市民睇真啲。