反中亂港出自傳 洋奴漢奸有運行

今時今日，反中亂港有運行，真係一啲都冇講錯。唔信？睇吓內地當局點樣包庇甚至吹捧淫賤黎，你就知道呢句說話珍珠都冇咁真。

係人都知，淫賤黎不嬲以反中亂港為己任，旗下報刊經常鼓吹「結束一黨專政」、「天滅中共」，與共產黨可以講係勢不兩立。但奇就奇在，共產黨寬宏大量到冇人相信，唔單止冇封殺淫賤黎，仲不斷為佢鳴鑼開道，塗脂抹粉添。

呢，珠海出版社今年四月出版咗一本淫賤黎自己撰寫嘅自傳《我是黎智英》，仲推出市面公開銷售，唔使問阿貴，淫賤黎喺自傳中梗係大肆吹噓點樣反中亂港喇。有人問，點解內地當局居然會放行咁反動嘅書？廣東省新聞出版局話喎，該書仍在審批中，根據法例唔可以喺市面出售，當局會採取進一步行動。至於乜嘢行動，睇怕只有佢哋自己先至知。

正如全國政協委員劉夢熊話齋，內地對出版物嘅監管非常嚴謹，人力物力充足，根本冇可能走漏眼，與共產黨勢不兩立嘅淫賤黎能夠登堂入室，擺明係上有政策，下有對策喇。而港區全國人大代表黃國健更直指，淫賤黎嘅自傳都能夠喺內地出版，肯定有部門失職，甚至涉嫌受賄。

講開又講吖，神州大地烏煙瘴氣，幾乎無官不貪，有人涉嫌受賄又何足為奇。其實，內地話就話禁止淫賤黎旗下刊物入境，但有人暗度陳倉，不斷將爛果報等反共報刊偷運入內地售賣，早就唔係乜嘢秘密喇。仲有吖，曾經係淫賤黎旗下公司承印嘅三份六合彩報被人長期源源不絕走私北上，鼓吹賭風，荼毒同胞，禍害仲大喇。如果話冇人受賄、冇人包庇，你信唔信吖？

唔怪得早前黨報大聲疾呼要包容「異質思維」喇，原來當局就係想包容淫賤黎反中亂港嘅「異質思維」。計太一叮話齋，既然淫賤黎都可以得到包容，可以喺內地出版自傳，咁其他洋奴漢奸、妖孽鬼怪就更加有運行咯。例如內地可以出版《我是李漢奸》，宣揚我要賣國；可以出版《我是長毛》，高呼我要搞茉莉花革命；可以出版《我是陳水扁》，鼓吹我要搞台獨；甚至可以古為今用、洋為中用，替吳三桂、汪精衞、秦檜、東條英機等人出版自傳，咁先至稱得上係百花齊放，係包容異質思維吖嘛。不過咁，正所謂物以類聚，人以群分，內地書店最好為呢啲洋奴漢奸、妖孽鬼怪開闢一個專區，一來方便好此道嘅讀者走埋一堆，二來避免正常嘅讀者受到污染，切記！

總而言之，早愛國不如遲愛國，遲愛國不如不愛國，不愛國不如賣國，幾時都係做漢奸有運行，叮！