政情：搞搞政：鬍鬚曾遏樓火得把口
樓市持續高燒，小市民置業夢難圓，民間怨氣亦一再升溫，好多建制中人都忍唔住，要求政府復建居屋，向熾熱樓市出重拳。不過，特區政府一於懶理，尋日財爺鬍鬚曾出席立法會財經事務委員會交代本港整體經濟最新情況時，就畀議員鬧佢睇住樓市乾燒都唔出手，鬍鬚曾回應時樣樣都話要「考慮」，一啲誠意都冇！
多名議員發言時，都話本地樓市情況令人好驚，甚至形容家吓市民供樓負擔嘅比例令人心寒。議員憂心，鬍鬚曾卻食住上，只識打靠嚇牌，話本地利率一旦掉頭，港人供樓負擔就更惡劣，猛話家吓風險大，可惜係除咗得把口外，政府都係冇招可出。
