政情：Olaf攝影展泡泡娛賓

本港知名攝影師Olaf Mueller同賢內助Jessica一向合作無間，尋日仲喺上環展出Olaf以肥皂泡為主題嘅最新系列《All Under Heaven》，吸引多位藝術愛好者嚟參觀，夜晚仲有活動要出席嘅名模Jocelyn都特登同老公嚟欣賞，Olaf仲即場玩肥皂泡，重演攝影創作。

製作超過半年嘅《All Under Heaven》，遠赴廣西多個地方拍攝，Olaf事前用咗三個月創作，之後又閉關三個多月做後期，不過拍攝期就只得七日。其中一張要拍日出前雲霞嘅光影，佢哋凌晨三、四點就要摸黑落山去到拍攝地方，由於機會一瞬即逝，錯過咗都無得再留多日，好彩Olaf事前準備工夫做到足，所以拍攝尚算順利。

今年只有三十一歲嘅德韓混血兒Olaf，原本做好有錢途嘅金融工作，後來半途出家做攝影，難得Jessica全力支持老公。Jessica話，六歲半嘅大女熱愛藝術，四歲嘅仔仔就冷靜思考，各有天分，不過孩子仲細，所以佢哋兩夫妻都會畀小朋友自由發展。