全港僭建無特赦 理順方案拖字訣

美國為挽救一己經濟危機，不負責任推出狂印美鈔嘅量化寬鬆貨幣政策（QE2），實際搵緊全世界笨。喺香港，僭建風暴演變成政治災難，港府為收拾殘局，閂埋門炮製「理順方案」，被人形容為「丁屋僭建QE2」，事關一樣咁搵笨。

首先，班新界鄉紳已經條氣唔順先啦，警告僭建無疆界，要拆就全港一齊拆，唔好淨係搞新界人，仲揚言不惜發動革命添。鄉紳喊打喊殺，一向表面「好打得」嘅發展局局長林鄭月娥表現閃縮，似有腳軟之勢，又輪到曾受屋宇署清拆令折騰嘅市區小業主怒吼：咁搞法，你順我唔順喎！

嗱嗱嗱，都話政府政策愈透明愈好㗎啦，外界雜音四起，全因港府一直對處理僭建問題含糊其詞，惹嚟猜疑，加上高官權貴相繼捲入風暴，港府被懷疑萌發放生念頭，一啲都唔奇。呢，最近之嘛，有人建議不如以補地價方式豁免清拆，又有人提出不如倣效當年寮仔部處理違例建築物咁啦，某個日期之前已經存在嘅霸王物業，一律特赦一了百了，搞到流言滿天飛。

理順方案步履不順，未出台已經七國咁亂，所以林鄭月娥不得不出嚟澄清，理順番自己呢個爛攤子嘞。佢尋日斬釘截鐵咁話，任何僭建均屬違法，特赦之說絕無其事，「諗都唔可以諗」，事關違反法治精神，補地價同樣唔可以，否則對無財政能力補地價或已經自行清拆僭建物嘅業主唔公平。

嗱，呢番話就似啲樣，無錯土皇帝係夠惡，之但係當局無理由未打就扯白旗投降吖嘛。為咗港府所餘無幾嘅顏面，點都要硬住頭皮撐落去，即使拆僭建唔成，反而「好打得」塊招牌被人拆咗係另一回事。叮！

點解太一叮咁講呢？好簡單，如果按當局嘅最新講法，即係全港僭建物都要拆無赦，之但係咁喎，事實上由於港府長期執法不力，全港違規建築已累積達數十萬計，唔通全香港同步拆樓呀？到時真正變咗石屎天堂都似！所以咯喎，所謂理順，根本無法理順！

嗱，林鄭月娥呢句最可圈可點嘞，佢話喎，僭建物問題嚴重而普遍，唔會喺短時間內解決。一句講晒：全港僭建無特赦，理順方案拖字訣。僭建問題積重難返，當局根本已經陷入老鼠拉龜嘅困局，唯一辦法就係拖，有即時危險嘅僭建物即時取締，無即時危險嘅忍得就忍，容後處理。即係還原基本步，到頭嚟乜都無做過，你話係咪搵笨？叮！