政情：毓民搶林公公講稿被阻

出走社民連另外搞咗檔人民力量嘅黃毓民同陳偉業，尋日喺立法會首讀有關遞補機制嘅《2011年立法會（修訂）條例草案》時，忽然喺議事廳發難，陳偉業喺大廳叫喊，毓民更離開座位，走到政制及內地事務局局長林瑞麟座位前，一邊破口大罵、一邊伸手欲搶對方嘅講稿，但被保安阻止帶離會場。離開會場後，毓民仍然好惹火，仲同專業會議嘅梁美芬嗌咗兩句。

毓民衝上前時，約六名保安員即趨前保護林公公，同毓民扭抱成一團，擾攘幾分鐘後，佢至被代理主席驅趕離場，期間眼鏡都被撞跌。事後毓民一啲都唔在乎：「我今次真係想掂到佢㗎，即使畀人告都冇所謂！」佢話事前曾考慮將水潑向林瑞麟，惟最終保安員快他一步。不過，今次偷襲成功，到草案恢復二讀時肯定會有更激烈舉措表達不滿。

毓民走到林公公座位前欲搶奪講稿，遭保安阻止，期間佢嘅眼鏡被撞跌。