政情：陳正欣黃進達做馬主

做馬主唔係有錢就得，仲要喺馬會抽中買馬許可證至得，前日馬會公布下年度馬季購馬許可證中籤申請人名單，演藝界中，天王郭富城有份，名人圈都有好多後生才俊上榜，包括保良局總理陳正欣、康泰旅行社董事總經理黃進達（Jason）同「壽司王」鄭威濤（Ricky）。

陳正欣今年首次以個人名義抽中做馬主，佢前日先接到消息自己「中獎」，獲得許可證可以購買曾經出賽嘅進口馬匹，一擊即中，運氣真係唔錯。咁啱佢之前睇中咗一匹新西蘭馬匹，依家應該會扑錘買入，至於馬名就會等愛駒年底到埗後先至再改喎。

至於首次升呢做馬主嘅Jason，佢坦言好驚喜，話會請教爸爸黃士心點樣揀匹駿馬，又話之前冇諗過抽籤會一擊即中，所以仲未有心水馬匹，唔排除會到國外選購，依家已開始搵定資料參考吓。至於馬名，佢話應該都會跟番家族嘅「旅遊」字頭，或同屋企人傾吓，揀個好意頭嘅名。