政情：林健鋒逼稅局咬住陳振聰

因千億遺產案備受矚目嘅陳振聰最近贏咗官司，高等法院裁定佢就逃稅問題提出嘅司法覆核勝訴，稅務局須重新考慮係咪延長佢嘅反對期限，陳得直同佢聲稱冇收到稅局追稅通知有關。尋日立法會開大會，經濟動力嘅立法會議員林健鋒（Jeffrey）就追瘦稅局有乜招數針對話收唔到交稅通知嘅人。呢一問，到底係追瘦稅局吖，定係唔放過箇中人呢﹖

約喺兩年前，即龔如心單遺產風波曝光冇耐，Jeffrey已喺立法會提咗條口頭質詢，要求稅局交代有冇向風水師等收入唔穩定嘅市民追稅，呢個風水師被普遍理解為陳振聰。結果呢條質詢問完冇耐，稅局就真係開始向陳振聰追稅。

到最近，陳振聰贏咗司法覆核，Jeffrey又向立法會申請提出另一條書面質詢，睇佢嘅質詢行文，係準備要求稅局交代有乜措施確保擁有納稅人嘅有效聯絡方法，確保唔會有納稅人聲稱收唔到稅局信件，而成功拖稅或避稅。須知陳振聰今次獲判勝訴，主因係佢指稱收唔到稅局嘅來信，從質詢嘅內容、時間嚟睇，都好易令人聯想到陳振聰，睇嚟Jeffrey對件事真係有心追到底噃！