政情：金沙CEO獲博彩業成就獎
經營澳門金沙同威尼斯人渡假村酒店娛樂場嘅拉斯維加斯金沙集團董事長兼行政總裁艾德森，尋日獲頒今年亞洲國際博彩博覽會卓越遠見成就獎。
艾德森除咗喺澳門博彩業大展拳腳，近年喺新加坡博彩業亦取得成績。原來新加坡賭場開業前，佢亦曾遭潑冷水，惟如今成績有目共睹，總算剝咗對方棚牙。佢預期澳門同新加坡嘅博彩市場會持續增長，因亞洲賭業發展仍未飽和，大有發展空間。
艾德森認為，佢獲得成績，在於較人「行先同睇多好多步」，因為博彩業逐步轉向綜合娛樂，業者除要提供賭場，亦要集展覽、購物等多方面於一身，成為真正度假式嘅經營。
