政情：林鄭女廁革命 姊妹繼續排隊

港女出街經常都面對廁所排長龍嘅煩惱，呢個問題嘈咗十幾年，政府一路都懶理。白鴿黨嘅劉慧卿尋日終於忍無可忍，喺議事廳提質詢，接招嘅係發展局局長林鄭月娥，兩個深受其苦嘅女性一個搭台、一個登台，宣布女廁將於明年起革命！不過，睇林鄭嘅女廁建議，就會明白點解啲婦女團體早早嗌定反對，因為新建議一啲都唔實際，林鄭同劉慧卿呢對廁所革命姊妹花，第日分分鐘都要為入廁所而鬆㬹！

婦女團體早潑冷水

林鄭尋日話，過去三年政府冇收過一單有關女廁唔夠用嘅投訴，不過，佢都話政府有留意公眾人士同婦女團體嘅意見。佢透露，家吓嘅《建築物（衞生設備標準、水管裝置、排水工程及廁所）》規例》中規定，男女廁多少係按使用者一比一計算，即係男女均等。呢個比例可以話完全冇考慮男女使用廁所嘅實際運作，過晒時兼且唔現實。

去到○五年九月，政府至透過工程師嘅《作業備考》，建議工程師設計時將廁所嘅男女性使用者比例改為一比一點二五。不過，呢個只係專業人士嘅作業備考，到家吓有幾多反映喺公眾場所，真係唔知。林鄭尋日話，經過詳細考慮後，屋宇署計劃將使用者男女比例由一比一點二五增加到一比一點五，即係一個男人對一點五個女人。不過，呢個建議早就惹嚟婦女團體不滿，仲指出男廁有尿兜疏導人流，女廁並冇呢種設施，即係話一比一點五都未必有用。

不過，林鄭尋日已言明，政府會喺下個立法年度內修改男女廁使用者比例嘅規例提交立法會，換言之最遲明年會有新嘅指引。咁即係話，全港女性繼續忍啦，等規例落實後，理想嘅情況係女廁條龍短啲，差啲嘅，咪好似家吓咁繼續喺廁所門口死忍囉！