消防買錯救火車 浪費公帑又害人

出街買鞋要先度好尺寸，太大會成日甩鞋，太細就分分鐘焗壞對腳，唔通真係削足就履咩。咁嘅道理照計細路都識，但偏偏香港消防處唔識，佢哋買嘢不嬲唔帶眼，浪費公帑不特止，仲隨時危及市民生命安全。叮！

呢，早幾年消防處用三億幾元買咗一批救護車，性能係唔錯，唔會行行吓死火，不過照樣寸步難行。事關消防處班老爺買車時根本冇考慮本港道路狹窄，新車又高又闊，威就夠威嘞，可惜好多街道過唔到，惟有兜兜轉轉，一個唔覺意就會延誤救治。

師奶買嘢唔帶眼最多嘥幾個錢啫，消防處買錯嘢就分分鐘害死人。係人都知道，無論係救護車接病人抑或消防車救火，都要爭分奪秒，時間就係生命，絕對唔可以慢吞吞。

更弊嘅係，消防處錯咗唔肯吸取教訓，一犯再犯。例如，佢哋○八年用七千幾萬元去法國買咗一批油壓升降台消防車，呢種車名義上作用極大，發生火警時可以喺外圍射水，防止火勢蔓延，車上有升降台，可以射得好高，係消防員嘅有力武器。

消防處一次過買咗十七架，簡直如虎添翼。誰知批車運返香港先至發現水泵有問題，射出嘅水柱軟弱無力，點滅火呀？當局急急腳請法國專家返嚟維修，舊年四月剛剛完成，點知好快又出事，有架車喺訓練期間忽然斷咗消防喉，好在係訓練啫，如果喺火警現場就死得人多咯。

消防處惟有將呢批車全部停止使用，啲車已喺車庫瞓咗差不多兩年。消防處家陣話會同法國生產商交涉，但係就冇咗下文。新車用唔到，惟有用番嗰啲舊車。問題係，呢啲老爺車老到甩牙，上斜路都唔係好夠力，靠佢救火實在牙煙到痹。

呢班高官慣咗大手大腳，唔係自己嘅錢，使多多都唔肉赤，好在庫房大把錢。嗱，政府物流服務署上個月忽然招標，再買四架油壓升降台車。

人命關天，有需要就應該買，但係嗰十七架車點處理？消防處起碼要有個交代，大拿拿七千幾萬，點可以就咁掟落鹹水海o架。仲有，今次買新車，一定要醒醒定定帶眼識車，否則又係害人害物。叮佢個鎯鎯！