政情：六嬸坐輪椅撐邵逸夫獎

邵逸夫獎基金會主席「六嬸」方逸華以主人家身份出席邵逸夫獎得獎名單發布會。六嬸平時行得走得鬼咁精靈，但係尋日竟然要坐輪椅出席，點解搞成咁？原來佢左腳痛風症發作，痛到行唔到，但佢叫大家唔使擔心，仲講笑話：「坐輪椅好舒服，有人推。」

六嬸話前日仲同六叔邵逸夫去半島酒店歎茶，點知前晚隻左腳就開始痛喇，好在有六叔關心佢。雖然六嬸一直話自己唔係好辛苦，但見佢去洗手間時要三個人扶住佢，左腳一落地就即刻痛到「殊殊」聲叫，睇來病情都唔輕。

今年邵逸夫獎都係由外國學者橫掃，係咪中國冇叻人呢？評審委員會主席楊振寧就話唔可以咁講︰「香港得七百萬人，全世界有十幾億，相對一定少人拿。」而且外國喺科研上喺三、四百年前已經起步，但係中國就係近幾十年先發展，所以遠遠落後於人一啲都唔奇，仲話未來十年、二十年要追得上絕對冇問題喎！