政情：Chi Lam入紙即中升呢馬主
張智霖（Chi Lam）、郭富城同另外兩位友人合資買馬，更向馬會入紙申請，想唔到「一擊即中」獲批。新任馬主之一嘅Chi Lam開心不已，且連聲覺得自己幸運，尋日接受電話訪問時話：「聽講有人抽四、五年都唔中，估唔到自己一次就OK。」咁去邊度買馬呀？佢話：「其實我乜都唔識，佢哋叫我夾份我咪夾囉，相信佢哋自有準備，不過呢啲嘢十畫都未有一撇，一切言之尚早。」他又打趣要努力搵錢養馬，心情興奮。
其實，「玩具大王蔡志明」同家人入咗四張申請表，最終只有愛女蔡加怡「一票獨得」，大女蔡加敏就被編作後備，但由於其家族高峰期曾擁有六匹馬，所以蔡志明接受訪問時話今次只係平常心而已。
張智霖（左）同郭富城（右）等幾位老友齊齊合資做馬主。 （資料圖片）