政情：搞搞政：吳光正避戰唔鬥鐵三角

雖然三大疑似特首候選人近日動作多多，而前全國人大代表吳康民更提出三人合作形成「鐵三角」，但政圈一直流傳仲有其他人可能參選，而選過第一屆特首嘅九倉主席吳光正亦係傳聞中嘅人選之一。

尋日九倉召開股東會，成班記者就圍住吳光正「逼供」，佢斬釘截鐵咁話無意再參選後，有記者叫佢品評吓三名疑似候選人，佢就耍太極話：「今日係九倉股東會喎！」擺明置身事外等睇戲。

恒隆集團主席陳啟宗都拒絕加入戰團，尋日出席「香港明天更好基金」記者會時，被問到會落場選埋一份，佢自嘲話：「第一，我冇咁叻！第二，我冇咁蠢！」佢又笑言唔夠架勢，冇疑似候選人搵佢畀意見，真係識講笑。

另外，港區全國政協委員尋日同中聯辦官員會面，亦談及二○一二年特首選舉事宜。中聯辦官員呼籲佢哋登記做選民，以便符合資格參與特首推選委員會，不過，官員就冇談及下任特首嘅條件嘞。