政情：潘潔僭建以笑遮醜
環境局副局長潘潔位於大埔沙欄小築嘅住所被踢爆天台僭建咗一間玻璃屋，兼且圍封露台，日前地政總署嘅高空相片，揭發原來佢係做咗問責官員後先至僭建，即係知法犯法，罪加一等。
潘潔尋日凌晨透過新聞處出稿，回應僭建醜聞，話正如佢喺五月十六日回應傳媒報道關於佢寓所問題時，佢話寓所出現嘅問題，責任都在佢，所以佢有責任做好，包括購入單位後裝修過程中嘅疏忽。而佢喺事件後已經即刻委託認可人士跟進，認可人士亦已經聯絡相關部門，確保工程依法進行。
講來講去，佢都唔肯承認僭建，尋日朝早一大班記者走去等佢返工，再追問佢有關僭建嘅問題，最關鍵佢係咪購入單位後先至僭建。佢只係用咗一分鐘時間笑笑口咁答咗三條問題，有幾大誠意，可想而知。擺明係以笑遮醜啫！