政情：扮大佬插嘴署男蘇被窒

葛輝風波愈揭愈精彩，事件主角前政府資訊科技總監葛輝尋日仲出席立法會舉行嘅特別會議，同涉事官員公開對質。眾所周知，葛輝今次擺明係衝住同佢不咬弦嘅上司、商務及經濟發展局常任秘書長謝曼怡而嚟，唔少議員都等睇好戲。

平時喺議事廳畀班議員鬧到頭耷耷嘅署任局長蘇錦樑，尋日唔知點解變得忽然神勇，喺特別會議起首已即時嚴詞炮轟葛輝，話葛輝嘅言論不盡不實，令人遺憾。其後喺多名議員質問謝曼怡有冇向葛輝政治施壓時，佢又話要出嚟「講番句公道說話」。唔少議員對佢不斷插嘴都感到不滿。

「問謝曼怡唔係問你呀」

白鴿黨李永達更勞氣，直接叫蘇錦樑收聲：「我問謝曼怡唔係問你呀！你唔好嘥我時間啦，我得五分鐘問問題咋！」畀議員窒咗一次，但係蘇錦樑仲係唔識收口，跟住喺會議上不斷插嘴做架両，激到班議員紮紮跳，狂叫佢收聲咪阻住個地球轉，呢啲咪叫自討沒趣囉。

老實講，葛輝事前都講明同蘇錦樑無關，佢做乜搞咁多小動作啫！佢可能自覺係署任局長，喺呢個水深火熱嘅情況下，梗係要扮大佬幫下屬；又或者佢要趁呢個機會話畀班議員聽，佢先係大佬，咁擺明係乘機搶風頭？無論係邊個諗法先係真，最終咪都係碰到成鼻灰。

一日未坐正，蘇錦樑都係「署男」，咪以為自己真係坐正充大佬先得㗎，夾硬嚟咪等於送上門畀班議員糟質佢，呢次佢真係自己攞嚟衰。